Pro 24 | ZomZIV | STEP | Migilote eng kei inla, amaute tawh kikhawl nuam kei in;

Proverbs 24

1 Migilote eng kei inla, ^a
amaute tawh kikhawl nuam kei in;
2 ahang in a lungsim un ngongtat ding sawmsim a,
a mukte-un mi buaisak nading bek gen uh hi. ^b
3 Pilna-in inn kilam a,
theihtelna tungtawnin kip hi; ^c
4 theihna tungtawnin a inndeite,
a manpha gou melhoih tuamtuam tawh kidim hi. ^d
5 Mipil in vanglianpi nei a,
theihna nei mi in thahatna a khangsak hi;
6 ahang in, galsim nadingin makai,
gualzawh nadingin thukuppih tampi na kisam hi. ^e
7 Mihai adingin pilna sang lua a;
kongpi-a kikhopna ah gen ding a nei kei hi.
8 Gitloh a sawmsim mi,
a phuangkhiapa in kingawh ding hi.
9 Hai phuangkhiatna mawhna hi-a
mi simmawhpa mite in kih hi.
10 Lungkham hunin na lung aneu leh
a hat het lo na hi ve!
11 Sihna lam zuana kipaipihte hukhia inla;
a kigo dinga kikaite lehkaih in.
12 “Hih thu thei kei ung,” na cih khak uh leh
lungsim khingkhaipa in thei lo ding hiam? ^f
Na nuntakna a cingpa in thei lo ding hiam?
Mikim a gamtatna tawh kizui-in thuk lo ding ahi hiam?
13 Ka tapa aw, khuaizu ne in, lim hi;
khuailu-a khuaizu khum na sa ding hi.
14 Na hinna adingin pilna a khum lam zong thei in;
pilna mu le cin mailam ah nang adingin lametna om a,
na lametna a mongbei kei ding hi. ^g
15 Thu palsat khat bangin a thumaan mipa’ inn bukin bok kei inla
a tenna mun luh kei in;
16 ahang in a thuman mi khat sagih vei a puk zongin tho kik a,
migilote ahileh vangsiatna in a pusuaksak hi. ^h
17 Na galpa a puk ciangin awi lua kei inla; ⁱ
a kimuktuk ciangin kilungnuamsak kei in;
18 na tua cih leh TOPA in hong mu dinga,
lungkim loin ama tunga a thangpaihna damsak kha ding hi. ^j
19 Migilote hangin lunglel kei in, ^k
amaute eng kha kei in,
20 ahang in migilopa in mailam ah lametna nei lo a,
migilote’ meivak kisukmitsak ding hi. ^l
21 Ka tapa aw, TOPA le kumpipa kihta inla, ^m
a lehdote pawl kei in,
22 ahang in tuate gel in amaute tungah siatpakna tungsak ding hi, ⁿ
a tunsak theih uh siatna kua in thei ahi hiam?

Mipilte Genbehlai Thute

23 Hihte zong mipilte gen thuthuk ahi hi: ^o

Thukhenna ah deidan neih a hoih kei hi: ^p
24 A khialte tungah, “Nang mawhpeng na hi hi,” a ci peuhmah -
mite in hamsiat in minamte in langgen ding uh hi.
25 Ahi hangin a mawhte mah mawh tangsakte tuahpha dinga,
ama tungah hauhna thupha tampi a tung ding hi.
26 Limtaka kidawnkikna in
muka kitawp tawh kibang hi.
27 A pualama na nasep zo photin
na lokhawh zo phot inla;
tua khit ciangin na inn lam in.
28 A thu om lopi in na vengpa langah teci pang kei inla,
zuauthu genna-in na muk zang kei in.
29 “Kei hong bawl bangin amah bawl ning;
ama sepsa mahin amah thuk kik ning,” ci kei in. ^q
30 Zongzawte lo gei-ah ka pai a, ^r
thu khentel theilopa lenggui huan ka nawk hi;
31 mun khempeuh ah lingkungte selto a,
leitung teng kiakin tuamin
suang kulhte kicim khin hi.
32 Ka tuahkhakte ka lungsim ah ka bulh a,
ka muhsa panin thu khat ka sinkhia hi:
33 Tomkha sung ihmut, tomkha sung lusuk,
tomkha sung khawla khutzep sungin - ^s
34 misuampa bangin na tungah zawnna hong tung dinga,
galphawn ^{▼▼24.34 Ahikeh mi vakvaite bangin / khutdawhngen cimawhte bangin} bangin taksapna hong tung ding hi. ^u